熊本打「舊將」主W抵撐

猪拉多纳

熊本羅亞素呢隊日乙班尾波，今日主場對住新升班嘅讚岐卡馬達馬尼，絕對有機會「打倒昨日的我」，1.75倍主W博得過。

（開賽時間：周日晚6:00）

熊本不嬲喺日乙都係半天吊嘅球隊，爬得上前10名嗰季已經要燒炮仗慶祝，今年日乙引入降班制度之後，佢哋就冇得玩玩吓嘞，個班底執正咗，既有卷誠一郎、藤本主稅、養父雄仁呢啲有日職經驗嘅球員，又有巴西兵柏保路費拉拿、彭拿法比奧同南韓前鋒鄭敏赫，計實力應該唔使捲入降班漩渦。

相反日乙新丁讚岐就擇使嘞，呢支隊名長過水蛇春嘅波，本來只係用全日本班底參戰，但係打咗6場全部輸清光之後，終於簽咗一件外援──南韓後衞宋韓基。加一件守衞有用咩？肯定作用唔大，因為讚岐家陣嘅主力入面，有唔少係熊本棄將，例如監督北野誠以前係熊本嘅總教練，後來升過做監督；總教練上村健一07至08年踢過熊本；前鋒木島良輔、高橋泰、岡村和哉同中場山本翔平係唔同時期嘅熊本舊將，啲路數畀人摸清晒，所以讚岐今日輸波嘅話，熊本可以話係「打倒昨日的我」。

咁熊本係咪贏硬呢？雖然佢哋有柏保路費拉拿養傷，橋本拳人坐波監，但係總體實力仲係高讚岐半線，起碼佢哋開季6場波都攞到2勝1和3負，叻過6場輸清嘅讚岐。當然，熊本想學06年日皇盃作客一戰，大炒讚岐5:0亦唔容易，3.3倍「讓球主勝」冇咁易得手，齋博主W算嘞。