馬體會3分目標必達

猪拉多纳

講到馬德里市打吡，第一時間會諗起皇馬同馬體會嘅對決，但實情基達菲都係同市球會之一，今晚西甲佢哋會喺主場迎戰馬體會，合演「小型馬德里打吡」，之不過兩軍戰績差天共地，衰到貼地嘅基達菲，難阻搶分爭標嘅馬體會贏波，2.22倍「讓客」咪錯過！

（now632台周一凌晨1:00直播）
基達菲近17戰僅1勝

基達菲自舊年12月底被巴塞大炒後一蹶不振，連同西甲同西盃踢咗17場波，只係取得1勝5和11負劣績，唯一贏波嗰場，係對住當時分心歐霸盃8強、需要遠征瑞士巴素利嘅華倫西亞，而佢哋上輪不敵艾爾切之後，家陣跌到落聯賽榜第18位，護級危危乎。

雖則基達菲今場有刑滿復出嘅柏度莫斯基拉喺中場鋪橋搭路，弊在左閘沙治奧艾斯古迪路同首席門將莫亞都要養傷，防線根本畀唔到人信心。再者佢哋今季對住西甲三強巴塞、皇馬同馬體會，每場例牌最少以兩球差距落敗，6場合共勁失25球，今晚想唔做炮灰都幾難。
迪亞高哥斯達傷愈

相反西甲「一哥」馬體會喺擊敗巴塞殺入歐聯4強後士氣如虹，為咗贏得繼95/96年球季後首個西甲錦標，主帥施蒙尼同班球員實搏到盡。箭頭「野獸」迪亞高哥斯達腿筋傷剛啱至好番，狀態唔知掂唔掂，難免會令讀者擔心開唔出「讓客」，但首循環馬體會狂派7蛋，除咗基達菲一球烏龍送禮，「野獸」只不過攻入一粒，其餘5球全部由魯爾加西亞、韋拿同阿祖安盧比斯包辦，證明今場「野獸」就算缺態都唔成問題！