多蒙特-1掃蕩禾堡

猪拉多纳

搶隻盃仔攞尾彩

德國盃4強開戰，多蒙特主場迎戰禾夫斯堡，「蜜蜂兵團」多蒙特即使先後緣盡今季聯賽及歐聯錦標，但並無損士氣，上仗德甲大炒拜仁慕尼黑3蛋，盡顯鬥心，必定力爭捧德國盃，攞番個尾彩，應會繼續強攻對手。禾堡首要目標係打入聯賽前4位，參加下屆歐聯，難以兼顧雙線作戰，加上防守差，抵擋唔住主隊強大火力，直取多蒙特1.83倍讓球主勝。

（無綫翡翠台周三凌晨2時30分直播）

多蒙特今季一直飽受傷兵問題困擾，導致成績下滑，但「受傷嘅野獸」往往更可怕。睇佢哋近兩仗演出，同巔峰時期無異，歐聯8強次回合狂攻皇馬，如果好運些少，應該已反勝對手晉級，上仗聯賽鬥拜仁，簡直當對手係出氣袋，盡情發洩。

多蒙特仍能保持高昂鬥志，教練高普居功至偉，呢位「狂人主帥」極具魅力，擅長激發球員士氣，唔會放過任何贏波機會，即使已無緣德甲爭標，都落力作賽，更何況德國盃仲有機會叫胡，肯定更搏命。
禾堡防線好易散

禾夫斯堡今季有望出戰下屆歐聯，但同時令球隊處於兩難，佢哋兵源唔充裕，想歐聯入場券及德國盃兼得，相當困難。禾堡仲有一大死穴，就係防守差，上月試過1比6輸畀拜仁及2比6不敵賀芬咸，睇見都牙煙。遇上弗爆嘅多蒙特鋒線孖寶馬高列奧斯及羅拔利雲度夫斯基，勢必難以招架。