恒大傷鋒踢守細波

猪拉多纳

墨爾本勝利搏盡爭出線

作客讓波本來就係大忌，廣州恒大（足智彩譯FC廣州）今日喺亞冠盃G組第5輪賽事，仲要殘陣挑戰澳超「4哥」墨爾本勝利，就更加難畀到人信心，呢場波都係博個2.3倍入球細算喇。

（now670台周二下午5:30直播）

恒大今場非常揼本，使咗成50萬人民幣買咗3,000張波飛，安排200個隨軍Fans同墨爾本華僑入場打氣，希望抵消勝利嘅主場優勢，但係球迷只能夠提供精神上嘅支持，勝負就要睇落場班球員喇。
迪亞文迪 郜林缺陣

喺陣容呢方面去睇，恒大主帥納比呢期真係好頭痛，事關今場波佢冇得揀，只得一個前鋒艾傑臣冇穿冇爛。郜林坐波監，迪亞文迪養傷連澳洲都冇去，狀態低沉嘅穆里奇，傷勢依然反覆，响中超表現唔錯嘅董學升，又冇報名打亞冠盃，搞到納比想擺兩個前鋒都難。

唔只係咁，鄭智、馮瀟霆一直有傷，連通天老倌榮昊都唔多妥，去到墨爾本第一課冇操到，喺呢場隨時動搖恒大榜首地位嘅大戰，納比的確揀無可揀，除咗希望傷兵快啲好番，就係要焗佢哋紮住落場，再唔係就用馮仁亮、楊超聲呢啲二線小將，想攞晒3分絕對難度唔細。

其實墨爾本勝利主場唔曳，响亞冠盃贏過橫濱水手，和過全北汽車，而且上次2月底作客廣州嗰陣，半場曾經領先恒大兩球，只係下半場散晒至倒輸2:4，家陣佢哋得4分排G組第3，今日贏埋恒大就有權爭出線，點會唔搏命？局勢被動嘅恒大，唯一可以做嘅係穩中求勝，起碼保住1分，唔好畀勝利追上嚟，開細嘅機會自然大好多。