北京爭出線背水一箭

猪拉多纳

亞冠盃F組四隊陷入大亂鬥，榜首同榜尾差一分，亂到癲！中超大軍FC北京（北京國安）今輪主場迎戰日職勁旅廣島三箭，北京今場輸波隨時提早畢業，佢哋不嬲都擅於「抗日」，而三箭教頭森保一並非高度重視亞冠盃，決心唔及對手，北京小讓平半捧上盤！

（now 670及672周三晚7時30分直播）

F組係現時亞冠盃形勢最緊湊嘅小組，榜首中岸水手有6分，其餘三隊同得5分，真係得一分上落。根據分組賽賽例，兩隊同分會計對賽成績，北京之前作客同三箭打成平手，若果今場不敵三箭，而同日中岸水手又戰勝FC首爾，咁北京就可以提早拜拜。

北京自知形勢處下風，一定會把握主場優勢全力爭勝，箭頭張呈楝仍未傷愈，但三大外援祖菲古朗、達高馬迪及烏達卡全部踢得，戰鬥力梗係唔曳啦！最重要係北京一向係「抗日」好手，之前12戰日本球隊錄得6勝4和2負，去季佢哋分組賽作客賽和三箭，返主場成功擊敗對手，今次有力再贏多鋪！
三箭人腳有限未必搏

另一邊廂廣島三箭主帥森保一對待亞冠盃態度唔算好積極，佢不嬲係都抱住爭到就爭嘅心態，之前作客經常收起主力。今仗賽前佢話好想爭做小組第一，等廣島球迷可以開心吓。

不過，呢班波人腳唔強，雙線作戰消耗好大，就算真係強陣出擊，去到北京亦唔係話搶分就搶到分，受讓都唔好睇得佢哋太高。