勝利駁火大陣仗

猪拉多纳

轉個靚場晒冷砌FC悉尼

一向有云：「讀萬卷書不如行萬里路」，咁我妹頭後生細女活力十足，依家當然把握機會去多啲唔同地方見識吓啦！所以娛樂台派我去拍旅遊特輯，我絕對義不容辭！前排我就去咗越南，去到有個強烈感覺，好似時光倒流返去十幾年前嘅中國大陸咁。依家喺球彩台主力講「澳職」，所以都好渴望短期內有機會去澳洲睇波兼旅行！

唔經唔覺講咗成季澳職，終於嚟到最後五場終極之戰。今日季後賽開打，會由墨爾本勝利主場對FC悉尼，而戰場就轉咗去可以坐五萬五千人嘅阿提哈德球場舉行，氣氛梗係比原本個細場AAMI球場好得多，班球迷噓一聲都嚇窒對方啦！呢場國家打吡，雙方係老對手，過去對賽三十一次，原來各自贏咗九次，十三次打和，果然夠晒五五波呀。不過講到深刻印象，應該係今季FC悉尼五球大炒「勝利」嗰場嘞！
迪比亞路力爭士哥

睇番勝利同悉尼喺最後衝刺嗰兩輪比賽，四場波同樣開出入球大，咁啱雙方同樣兩場入六球，可見攻力出色。FC悉尼隊長迪比亞路隨時踢埋今場就講拜拜，相信班球員都想入多幾球，而且呢場仲有久休箭頭迪斯普杜域復出，佢都唔想踢一場季後賽就算啩！

但勝利又點會咁輕易放過對手？佢哋喺周中亞冠盃爆冷贏咗廣州恒大（足智彩譯：FC廣州），為今日打咗支超級強心針！仲有佢哋嘅中場重心古希美今場復出，有助球隊進攻，唔使諗咁多，一於撐入球大！

（有線64及203台周五下午5時30分直播）
妹頭推介：墨爾本勝利VsFC悉尼

入球大