勝利食住個勢o趙悉尼

猪拉多纳

澳職季後賽首圈

我係第1代澳職主持，數吓手指都講咗6季！今季眨吓眼又到季後賽，今日首圈先由常規賽第4位嘅墨爾本勝利主場迎戰第5位嘅FC悉尼，睇聯賽排名都知兩隊實力旗鼓相當，不過FC悉尼教練法連拿一直畀球迷鬧，話佢有迪比亞路孭飛，都係僅入季後賽，士氣認真麻麻。反觀墨爾本勝利啱啱喺亞冠盃贏咗衞冕嘅廣州恒大，小弟睇好佢哋可以一鼓作氣繼續W，撐1.82倍主勝！

（有線64及203周五下午5:30直播）

墨爾本勝利啱啱喺亞冠盃分組賽爆冷砌低廣州恒大，成班波信心同士氣都爆晒燈，教練梅斯卡特話，呢場勝仗係球會史上最重要嘅勝利，並唔誇張！勝利雖然近期硬仗連場，但隊長米利根喺賽前話，隊友就算「唔要命」都會搏到盡，去踢埋呢幾場今季最重要嘅比賽。喺亞冠盃受傷嘅後衞利查，經檢查後證實左腳冇骨折，有機會趕得切踢今場澳職大戰。
贏完恒大士氣爆燈

對家FC悉尼今季3次對住勝利雖錄得2勝1和，不過前鋒迪斯普杜域同後防懷奧今場波都受到傷患困擾，有可能要紮住上，表現肯定大打折扣。加上備受批評嘅教練法連拿已經收到球會最後通牒，今場波唔掂就可能要執定包袱，主帥冇心機，班兵士氣又點會好？今場作客睇怕都危危乎咯。
頂占筍盤：墨爾本勝利（主勝）