3弱進擊安全地帶

猪拉多纳

護級直路最後掙扎

英超席位價值連城，一旦不幸降班將會損失慘重，而目前深陷護級危機嘅「榜尾3弱」富咸、卡迪夫城同新特蘭今晚分途出擊，將盡最後努力爭取來季繼續留喺英超角逐。形勢上卡迪夫城同富咸形勢上都好被動，而包尾嘅新特蘭距離安全線更差6分之多，因此3隊想進一步行近留級嘅「安全地帶」，今晚真係要搏盡搶3分至掂。
熱刺砌盡爭前六 富咸大鑊

早場「褪色倫敦打吡戰」熱刺主場鬥富咸，今季兩隊表現都令人失望，尤其熱刺投資與成績唔成正比，依家連爭歐霸都危危乎；至於富咸本有實力留喺中游位置，點知依家深陷降班漩渦。雖然兩軍表現都唔掂，但佢哋今晚都各有目標，都要全力搏殺，鬥攻之下大盤捧得過﹗

（now 621周六晚7時45分直播）

加里夫巴利依家喺皇馬踢到風生水起，但佢嘅舊東家熱刺就唔係咁掂，聯賽排第6爭前4打歐聯機會好微，後面又被曼聯追到氣咳，依家連歐霸盃席位都好危。雖然歐霸對好多歐洲豪門嚟講只係雞肋，但以熱刺今年咁嘅投資，如果被擯出歐洲賽真係好難交代，餘下幾場點都要搏埋佢。熱刺冇咗巴利後實力大削，幾個貴價新兵又冇貨交，只有基斯甸艾歷臣叫做好啲，近排要靠舊將艾迪巴約同新仔哈利卡尼入波，今場仍然係要靠呢個鐵三角攻堅。
賀治比按例唔踢得

富咸同熱刺可謂難兄難弟，季初簽入戴倫賓特、柏加等新兵，加埋洛達列加、薛維爾等實力球員，班底喺英超衰極都應該係中游分子，點知踢到不知所謂，換咗兩次主帥成績都係冇乜改善。

不過，嚟到危急關頭佢哋近期又取得兩連勝，護級重現生機。今場雖有因借用條款而唔出得嘅中場賀治比，但其他球員應會跑多兩步填補佢嘅空缺，由於兩隊爭勝意欲強，鬥攻之下大盤值得捧場。
領隊Chit Chat

馬加夫(富咸)：見到新特蘭上場差啲贏到曼城，就知嚟到季尾冇嘢係冇可能，我哋雖然連贏兩場，但仲未係時侯慶祝，對熱刺仍要全力以赴。