車仔衝冠踩行油 黑貓命危

猪拉多纳

「黑貓」新特蘭周中賽和曼城令人驚喜，但同時亦令今晚對手車路士加強咗警惕，想再爆冷相當困難，尤其以佢哋有限兵源，連續第二場作客豪門，隨時回唔切氣而崩潰。車仔落後榜首利物浦2分，餘下4場聯賽，冇失分空間，即使有歐聯後顧亦必傾力一搏，直取讓球主勝。

（now621周日凌晨零時30分直播）

曼城失分，車仔成為最大得益者，因佢哋只要贏晒最後4場聯賽，包括擊敗利物浦即奪冠。「奪冠4部曲」首站對包尾新特蘭，冇理由、亦唔容許失拖。因此就算下周中要出戰歐聯4強首回合作客馬體會，領隊莫連奴都唔理得咁多，最緊要先攞聯賽呢3分。特別係寸王吸取早前留力踢歐聯而意外輸畀水晶宮後，今仗絕對唔敢大意，強陣出擊下，新特蘭根本唔夠砌。
丹巴巴亞季尾着火

事實上，車仔主場一向硬淨，連歐聯在內，近7次主場全勝兼冇失波，其中6場淨贏對手兩球或以上，數據非常堅挺。最難得係大後備丹巴巴亞近期着晒火，對巴黎聖日耳門同史雲斯都射入絕殺入球，係車仔季尾爭雙料冠軍嘅一路神兵。

新特蘭上仗本可贏曼城，惜臨尾被逼和，認真洩氣。值得留意係「黑貓」季尾連場硬仗，近期先後鬥過利物浦、熱刺、愛華頓同曼城，真係打到殘晒，今仗疲兵征史丹福橋勢成炮灰。
領隊Chit Chat

普耶(新特蘭)：我嘅同鄉蘇亞雷斯當然想我哋令車路士失分，但我要強調我哋係為自己而戰，唔係為利物浦，今仗一定要打出上仗咁嘅表現。