阿聯喪攻狙擊水手

猪拉多纳

澳職季後賽賽制上季開始改革，由較複雜嘅晉級方法到依家得番五場波，場場生死戰，一致獲得球迷好評。今日就由常規賽第三嘅中岸水手，主場面對第六位嘅阿德萊德聯，妹頭睇好阿聯頂得住主隊晉級，一於揀受讓平半嘅阿聯。

雖然第三同第六排名上有分野，但實際上常規賽最尾階段大激鬥相當緊湊，最終水手同阿聯只係相差四分，而且近兩次對賽阿聯加埋送咗六隻光蛋畀水手，心理處於上風！作為具娛樂性又主攻嘅球隊，今場一開波阿聯定會向水手後防窮追猛打，陣中一對南美殺手卡路斯卡同法比奧費拉拿狀態托弗，配合迪捷特及摩拉利斯紐曼喺前線進攻，阿聯攻勢一定有睇頭。阿聯教頭甘巴爾要小心嘅當然係中岸水手快速反擊，只要頂得住就贏咗一半，後防主將保加特啱啱同球隊簽咗新約，今場可大顯身價！
悶蛋水手近況曳

其實自前教頭艾萊特離開咗水手後，水手就無晒上季總冠軍嘅氣勢，周中喺亞冠盃主場輸埋畀FC首爾，整體表現亦唔多妥。況且佢哋踢法沉悶，球迷角度當然希望踢法較悅目嘅阿聯能夠再晉一級，下場挑戰布里斯班獅吼！

（有線64及203台周六下午2時30分直播）
妹頭推介

中岸水手Vs阿德萊德聯

下盤