聖日耳門半場獻細

猪拉多纳

伊巴缺陣再吃里昂悶棍

法國聯賽盃今晚上演終極決賽，里昂、巴黎聖日耳門於巴黎法國球場角逐本季首項國內錦標。里昂上周末於聯賽擊敗聖日耳門攞頭彩，無論喺士氣上或心理上都有刺激作用。聖日耳門個人質素雖然好過對手，但王牌射手伊巴謙莫域受傷對進攻有明顯影響，吃完悶棍相信會踢得較緊慎，波童捧半場細。

（TVB 302周日凌晨3時直播）

兩軍上周剛於聯賽交手，里昂憑主場之利小勝一比○，論實力及個人質素，里昂一定唔及聖日耳門，不過上場聯賽之贏波，相信可以增強佢哋嘅比賽信心，拉近彼此距離。聖日耳門今季喺國內橫掃，連最具威脅嘅摩納哥喺聯賽榜都被佢哋拋離十分，表面上近乎無敵手，不過連同之前不敵車路士，佢哋已經連續兩場冇入波，狀態似有回落，最主要原因係王牌前鋒伊巴謙莫域受傷唔出得。原本烏拉圭前鋒卡雲尼應可填補其空缺，可惜落到球場佢嘅表現差強人意，連教練白蘭斯早前都承認，卡雲尼可能因為傷過一段長時間，唔想喺呢一刻再傷而受影響到踢世界盃，所以表現就住就住，直接影響咗球隊嘅入球能力。
博埋2.25倍半場和

聖日耳門吸取咗上次聯賽輸波教訓，斷估今次唔會再輕敵，翻查近幾屆法聯盃決賽成績，上半場例牌少交收，如以今場半場大細中位數1/1.5計，對上四屆都開出半場細，唯一一次出現多過兩個入球係波爾多對低組別嘅瓦納，足證同級對碰大家都會踢得較保守。如果嫌1.62倍半場細冇分頭，可以博埋2.25倍半場和，事關過去四屆決賽入面，有三次半場都係打和○比○，有充分數據支持。