熱刺富咸駁火合演入球騷

猪拉多纳

英超今季唔單止爭標形勢難分難解，下游分子為護級亦都競爭激烈，當中第18位嘅富咸只係落後尾4嘅諾域治2分，今晚去到白鹿徑球場相信唔會坐以待斃。富咸有「救命射手」洛達列加壓陣，對住近期鋪鋪大大鑊嘅熱刺肯定大把波入，呢場「倫敦打吡」梗要捧1.52倍入球大啦！
洛達列加腳風順

富咸最近為咗護級搏晒老命，表現明顯脫胎換骨，最近就先後以2:1同1:0連環砌低阿士東維拉同諾域治，當中造訪維拉場波更加有成16次攻門並且8次命中目標，證明富咸即使作客都唔會死守。查實最近富咸連環搶分成功，洛達列加絕對係功臣，呢位哥倫比亞射手連續兩仗為球隊射入致勝球，腳風同信心都返晒嚟，話唔埋富咸今晚又係靠佢開飯。
維頓漢 戴臣養傷

反觀熱刺家陣落後「四哥」阿仙奴7分，隨住球隊喺歐霸盃出局加上領隊舒活勢將喺季尾劈炮，呢支倫敦球隊嘅士氣真係好一般，最濕滯係一對中堅維頓漢同戴臣仲養緊傷，防線穿晒大窿，怪唔之近兩仗勁失4球啦！不過咁，熱刺爛船都有三斤釘，小將哈利卡尼連續兩仗有波入，由佢夥拍艾迪巴約攻堅夠晒睇頭，加埋基斯甸艾歷臣無論遠射定抑或罰球都冇得頂，淨係睇熱刺近5仗勁入13球就知佢呢班波幾猛火，況且熱刺已經連開5口大，咁好路冇理由唔追啫！