中岸水手主W手到拿「萊」

猪拉多纳

澳職季後賽首圈賽事今日繼續進行，常規賽「3哥」中岸水手會喺主場迎戰掹車邊入季後賽嘅阿德萊德聯，雖然「阿德」近兩次對碰都食住「水手」，不過「水手」嘅主場威力唔係人咁品，「阿德」崇尚嘅華麗足球踢淘汰賽唔係上算，隨時好睇唔好食，今場都係捧2.25倍主W夠划算。

（有線64及203周六下午2:30直播）
阿德萊德聯攻強守弱

「水手」近兩次對賽分別輸0:2同0:4，但教練菲爾摩斯賽前大口氣表示：「近兩次對住阿德萊德聯失咗6球，我當然知道佢哋長處係咩，但淘汰賽踢法唔同，我已搵出佢哋嘅弱點，絕對可以加以利用嚟晉級，弱點係咩？我梗係唔可以講出嚟啦！」查實中岸水手近兩場輸波都係作客，而佢哋主場對阿德萊德聯已經5年未輸過，近6次主場賽事更贏足5場，難怪菲爾摩斯信心爆棚。

阿德萊德聯喺常規賽最後一仗輸波跌落第6位，勉強保住個季後賽資格，最後5輪常規賽更只係得1場贏波，教練甘巴爾仲話佢要帶隊到2017年，先可以將佢嘅足球理念完全融入球隊，即係話唔使旨意班波可以喺短期內大躍進啦！事實上「阿德」嘅主攻踢法雖然深受球迷歡迎，但就令防守唔多穩陣，所以今季常規賽對住實力較強嘅布里斯班獅吼同墨爾本勝利都輸波收場，今場面對「水手」多數冇運行喇。
頂占筍盤：中岸水手（主勝）