周日殺手孭飛 紅魔唔驚拖肥

猪拉多纳

曼聯今季淪為球壇笑柄，領隊莫耶斯亦成為球迷抽水對象，今晚佢首度重返葛迪遜公園球場，當然係全場焦點。單睇今季走勢，紅魔點都唔及對手愛華頓，不過曼聯喺歐聯出局後可疊埋心水喺聯賽搶分，倒戈嘅朗尼又係英超「周日殺手」，曼聯受讓平半應該搵到食。

（now621台周日晚11:10直播）
朗尼星期日入波冠英超

紅魔一如外界所料，喺歐聯8強畀拜仁慕尼黑踢出局，今季餘下「挽飛士」目標，就係爭取來屆歐霸盃入場券。公平啲講，查實曼聯近期喺聯賽表現明顯好轉，自從打吡戰吞完曼城3蛋後，先後以4:1、4:0大炒維拉同紐卡素，當中桑馬達更加重生，喺鬥「喜鵲」場波貢獻兩球兼一個助攻，缺陣對拜仁一戰後復出肯定勁餓波，但講到今仗搶分關鍵，肯定非朗尼莫屬！

「魔童」前晚證實只係撞傷腳趾，並唔係骨折，今晚可以聯同克服小腿傷患嘅中場費蘭尼齊齊倒戈。唔講唔知，原來朗尼每逢周日出擊特別醒神，歷來喺禮拜日踢嘅英超累積入咗52球，周日入球量冠絕英超，由佢同桑馬達合作攻堅，愛華頓後防都咪話唔危。
愛華頓「斷氣」讓唔起

冇錯，「拖肥糖」今季喺馬天尼斯帶領下，表現無疑令人眼前一亮，但盧卡古同巴克里兩位攻擊好手近仗突然死火，最近2場聯賽都冇波入。最「騎呢」係隊波明明Run得鬼咁順，但馬天尼斯上仗就突然留力，收起占士麥卡菲並安排艾登麥基迪擔正，卒之喺主場無厘頭以2:3輸畀護級分子水晶宮，唔單止將「四哥」席位拱手讓咗畀阿仙奴，最大鑊係打斷球隊勇勢，今仗點睇都唔似讓得起曼聯。
Data King：紅魔英超作客醒

‧曼聯英超作客成績優異，17戰錄10勝3和4負。

‧雙方近5仗同樣有4場開半場細。

‧拖肥對上一次聯賽雙殺曼聯係69/70球季。
乜都玩錦囊：拖肥慢熱捧半場細

愛華頓表現慢熱，近12場英超當中，有9仗嘅上半場都冇波入，撞正連續5場英超作客保持不失嘅曼聯，1.45倍半場細真係趁熱食。