搶歐聯入場券搏盡 史浩克平手盤「特」勁

猪拉多纳

周日德甲上演「雙史」對決，史特加主場迎戰史浩克04。喺降班邊緣掙扎嘅史特加，為搶分護級鬥心十足，可惜踢落表現有心無力，相反傷兵成籮嘅史浩克，為保歐聯分組賽入場券愈戰愈勇，今晚足智彩開平手盤，捧史浩克坐和望贏。

（有線61、64、201及203周日晚11:30直播）
史特加近況頹爆

史特加只有落場機會極少嘅中場沙拉亞養傷，可惜齊腳唔代表就有好成績，佢哋喺歇冬後經歷完7連敗，至今踢咗14場僅得2勝3和9負劣績，贏波嗰兩場為護級對手弗賴堡同漢堡。上輪對住慕遜加柏雖然先拔頭籌，但結果同早前鬥雲達不來梅同布倫瑞克一樣，喺領先下最終被逼和，今場面對級數更高嘅史浩克，贏波談何容易。

另一邊廂嘅史浩克傷兵滿營，馬高賀查、賀維迪斯、內田篤人等做晒十字軍，但對於努力爭取歐聯分組賽入場券嘅佢哋嚟講，好似一啲影響都冇，喺歇冬後13場聯賽除咗輸過畀班霸拜仁，其餘12場9勝3和表現硬淨。即使新星達斯拿今場停賽，中前場仍有亨特拉爾、法芬同奇雲保定等猛將孭飛，況且班波踢到順晒兼夾士氣高昂，平手盤值博。