撐阿積士割「禾」捧盃

猪拉多纳

荷蘭盃進入終極一戰，施禾利終於遇到考驗，除咗4強對荷甲下游球隊奈梅亨外，之前4輪全部都係荷乙、丙組球隊，真係行運行到落腳趾尾！論實力，施軍絕對冇得同決賽對手阿積士鬥；今場阿積士讓一球，推介1.95倍嘅「讓球客勝」，一於撐阿積士大勝捧盃！

（開賽時間：周一凌晨0:00）

施禾利喺今屆荷蘭盃可以話係抽到支最好嘅籤，一路都冇遇到強勁對手。當8強其他荷甲球隊互片，施禾利就大炒丙組仔古積克5:1晉級，4強先叫遇到荷甲球隊奈梅亨。
施禾利近兩月僅兩勝

施軍入得決賽當然想捧盃，但係佢哋近況真係麻麻，2月到依家只係贏得兩場波，攻不強又守不穩，對住荷甲傳統勁旅阿積士，莫講話要贏，就連想入一球都唔容易。

另一邊廂，阿積士雖然喺歐霸盃畀薩爾斯堡踢咗出局，但係佢哋喺聯賽同荷蘭盃繼續有好表現，近5場4勝1和就睇得出阿積士有幾Fit。阿積士仲有機會爭做「雙冠王」，今場決賽一定會去盡博先攞個荷蘭盃打底。