畢爾包3.65倍「讓客」有計

猪拉多纳

巴塞士氣直插谷底

巴塞隆拿今晚會喺魯營擺擂台迎戰畢爾包，「地上最強」先喺歐聯畀馬體會淘汰，上周中西班牙盃決賽對住缺少C朗嘅皇馬又輸1:2，加埋上輪聯賽輸畀格蘭納達，3連敗令佢哋失落兩個錦標，西甲亦爭標機會渺茫。美斯喺呢3場賽事變身「散步帝」完全冇嘢睇，巴塞士氣當然直插谷底，今晚對住首循環擊敗過佢哋嘅畢爾包未必贏得到，「張峰」心水梗係敲3.65倍「讓客」啦！

（now632台周一凌晨3:00直播）

巴塞喺西甲雖然踢少榜首嘅馬體會1場，不過已經遠遠落後7分，就算煞科日主場擊敗馬體會，都仲要寄望「床單軍團」同皇馬失分先至有望奪冠，衞冕難度極高。佢哋失落西班牙盃冠軍之餘，仲有尼馬同佐迪艾巴受傷要抖足1個月，今場會同碧基齊齊缺陣。雖然「新比利」話希望可以喺煞科戰回歸，但情況並唔樂觀。
前線啞火 尼馬盼煞科戰回歸

從巴塞近3仗只係靠年輕中堅馬斯巴查入過1球波，就睇得出家陣「地上最強」前線嘅創造力同把握力都非常唔掂，相信同今季上任嘅領隊馬天奴改變「最強」戰術有關。美斯近期傳出因為球會內部問題「Hea踢」，每場比賽跑動極少，連主將都咁搞法，全隊士氣當然大受打擊！「球王」再唔挺身而出，巴塞想贏波都難！

客軍畢爾包喺積分榜穩佔第4位，相信佢哋都希望盡早鎖定下屆歐聯資格，今晚又點會放軟手腳先？論近況，兩連勝嘅畢爾包當然好過巴塞，加上前鋒阿度里斯狀態甚勇，近兩仗攻入4球，今仗相信都唔會陷於捱打局面！而且畢爾包首循環曾經以1:0擊敗巴塞，今晚去到魯營心理壓力唔會太大，有機會喺出現信心危機嘅巴塞身上搶分，受讓點可以唔支持？