馬體會煞車半場和

猪拉多纳

3D惡漢打造一級防守

馬體會「3D」打造一級防守！今晚歐聯4強首回合，「床單兵團」馬德里體育會喺主場硬撼車路士，前者由主帥施蒙尼帶領、猛將高甸同迪亞高哥斯達壓陣下，三個「Diego」惡漢將馬體會後防全面升呢，適逢車仔新敗勢頹，以主帥莫連奴算死草性格，作客一定穩穩陣陣做好防守，務求不至多失，相信初段戰情緊張而不精彩，斯維認為半場和非常值博。

兩隊風格極似，車仔主帥莫連奴一向防守大過天，施蒙尼更將以往遇強即屈嘅馬體會，調教成一支鐵血之師，雙方好注重中前場逼搶，因此囤積一堆「劫匪」。上圈「床單兵團」一開波就獅子搏兔，壓到巴塞有氣冇碇抖，攻入一粒後即駐重兵喺中後場，畀班球員回氣之餘，亦可睇準機會打快速反擊，結果巴塞控球贏晒，但真正具威脅嘅攻勢唔多，相反馬體會多番突擊幾乎拉開比數，絕對唔係講笑。呢種有別於其他西班牙球隊嘅技術流球風，雖被人批評太過粗野，但往往打到對方陣腳大亂，連不嬲搓到人暈嘅巴塞都畀佢哋嚇窒，難怪依家位居西甲榜首喇。
施蒙尼注入鬥士精神

球員時代踢防中嘅施蒙尼以勇悍見稱，佢將嗰種永不認輸嘅鬥士精神灌輸落馬體會，而施帥戰術執行者嘅最佳人辦，正係同佢一樣名叫「Diego」嘅前後場主力迪亞高哥斯達及高甸。唔好睇迪亞高哥斯達士哥頻頻，其實係一名防守型中鋒，佢經常喺前場不惜氣力做搶截，儼如球隊第一道屏障，至於中堅高甸勇而不茅，高波殺晒之餘，亦有好強嘅補位意識，加上車仔借畀佢哋嘅門神泰拔高圖爾斯可以披甲，令防線滴水不漏。
寸王擺工兵陣保不失

車仔啱啱喺聯賽爆冷輸畀護級分子新特蘭，主帥莫連奴帶領車仔77仗主場聯賽不敗神話亦告幻滅，狀態認真麻麻，仲有右閘伊雲洛域坐波監，畢竟今仗只係首回合，「寸王」會以唔失波為大前提，實擺晒韋利安、拉美利斯、大衞雷斯等工兵喺防線前做掃蕩，並吸收過巴塞出局嘅教訓，初段必定集中精神，避免太早落後陷於被動，馬體會未必咬得入佢哋，預計上半場會處於膠着，半場和捧得過。
Player Browser：佐治高基

佐治高基係典型box to box中場，永不言倦嘅跑動串連球隊嘅攻守，雖然創造力麻麻，但其傳波成功率高達八成，現時更係西甲助攻榜一哥。佐治高基勝任中場多個位置，攔截同搶波都掂，在主帥施蒙尼強調防守嘅戰術下，係中場壓迫嘅重要棋子，加上佢失驚無神嘅後上入楔，令對手防不勝防。
艾斯派古達

由於右閘伊雲洛域今仗停賽，今季長打左閘嘅艾斯派古達可能要重操故業，不過呢位西班牙小將日前聯賽對新特蘭跣腳，累球隊被罰12碼兼輸波，唔多唔少影響信心，撞啱馬體會擅於全場壓迫，艾斯派古達勢必成為眾矢之的，佢頂唔頂得住對手嘅狂轟猛炸，將係車仔能否全身而退嘅關鍵。
歐聯密碼

02:車路士對上兩圈淘汰賽首回合均作客，結果只得1和1負，但2次都能取得作客入球

03:雙方過去3次交手各贏1次，其餘1次打和，最近為2012年歐洲超級盃，馬體會以4比1擊敗車路士

04:車路士近4場作客輸3場

05:馬體會今屆歐聯5場主場比賽全勝

09:馬體會近9次主場對英超球隊未輸過，取得5勝4和