皇馬夫添唔係仁咁品

猪拉多纳

歐聯4強首回合上演重頭戲，由「銀河艦隊」皇家馬德里主場迎戰德甲班霸拜仁慕尼黑。兩軍晉級過程均具說服力，世紀激戰在所難免，不過皇馬啱啱缺少咗C朗仍然捧走西盃冠軍，士氣好到不得了，今場波C朗更加會「王者」回歸，肯定如虎添翼！相反，拜仁自從做咗德甲冠軍後表現走晒樣，此消彼長，皇馬個「讓球主勝」有成4.2倍，博得過！

（有線61、64、201及203、中央5台周四凌晨2:45直播）

皇馬捧完西盃冠軍後，西班牙足總特別照顧佢哋，畀皇馬上星期聯賽輪空，西班牙傳媒《馬卡報》計過，「銀河艦隊」足足有成165個鐘頭嘅「叉電」時間，相信一眾「艦隊猛將」都已經養精蓄銳，準備定今場世紀激戰。
捧完德甲 拜仁跌晒Watt

王牌球星C朗前日宣布會喺今晚披甲，練波嗰陣仲生龍活虎、鬼咁醒神，雖然尋日有消息指另一位翼鋒加里夫巴利因患感冒缺操，但據講呢位威爾斯Icon已經好得七七八八，今晚會如常上陣殺敵，陣容依然完整。事實上，皇馬除咗C朗同巴利，其餘球員狀態都好好，可以擔起大旗，賓施馬、莫迪歷等Keep住有貨交唔在講，就連盛傳離隊嘅阿根廷國腳迪馬利亞，亦有上乘表現，近兩仗都有士哥，以皇馬咁恐怖嘅鋒力，絕對可以摧毀世上任何一條防線。

對家拜仁今仗有大將舒韋恩史迪加同查維馬天尼斯復出，中場陣容係完整咗，不過正如哥迪奧拿所講，拜仁自從封王德甲後，球員嘅集中力開始下降，即使佢哋非常重視今場大戰，但要班長時間冇受挑戰嘅球員突然撻着，絕對唔係講咁易，而且對手仲要係狀態「托弗」嘅世界級球隊，又點靠得住先？博皇馬贏2粒有4.2倍分頭，小試無妨吖！
Data King：皇馬歐聯主場不敗

‧安察洛堤執教生涯6次對陣拜仁不敗，成績4勝2和。

‧皇馬近17次主場出戰歐聯，取得15勝2和不敗成績，當中更場場有波入，共入55球。

‧拜仁今屆歐聯5場客戰，開出2次「半勝」及3次「半和」。
乜都玩錦囊：博埋「艦隊」半W

皇馬主場威力超勁，加上教頭安察洛堤對拜仁特別有計，執教生涯6戰4勝2和保持不敗，皇馬換邊前又鍾意搶彊，半場主W有2.8倍，值博！