首爾 北京細不兩立

猪拉多纳

亞冠盃F組「首都之戰」─FC首爾主場對北京國安（足智彩譯FC北京）今晚爆發！呢場出線席位兼尊嚴嘅肉搏，雖然喺賽前充滿火藥味，實質兩邊都好驚輸波，咁嘅環境都係玩1.68倍入球細保險啲。

（中央5台周三晚6:30直播）

首爾喺F組帶頭，今晚和都可以晉級，數字上排第３嘅國安就蝕低啲，佢哋同廣島三箭、中岸水手同得6分，除非後兩者今晚都打和，否則國安和都唔掂，所以形勢上國安一定要搏3分，首爾就唔輸一樣OK。但係北京、首爾係中韓嘅首都，勝負牽涉到自尊心問題，兩邊都想贏波出線，你睇吓首爾張宣傳海報，唔只重提舊年國安去佢哋度作客，毀壞更衣室單嘢，仲用埋「惡緣」兩個中文字，擺到明要有仇報仇。

坦白講，首爾今年表現差過舊年，尤其鋒線把握能力公認跌咗Watt，上星期响韓職輸畀浦項制鐵場波，佢哋無疑收起咗高明振呢類主將留力，全場得7次射門不特止，仲衰到冇一腳中龍，如果國安條防線小心謹慎一啲，首爾要入波唔係一件易事。
國安主帥保守強調攻守平衡

當然，國安理論上和都可能要執包袱，今晚焗住要出去攻人，但係九叔以前都講過，佢哋個教頭文沙奴戰術思維保守，何況仲可以睇住廣島對中岸場波嘅發展做嘢，和波未必衰硬，恐怕文沙奴依然會穩中求勝，佢尋日先話「進攻上肯定要落好多心思」，然後又補多句國安會「選擇攻守最平衡嘅陣容」，咁即係想點？完全唔似會放開手腳進攻喎，想唔開細都難啦。
亞冠盃F組