賓菲加淡定吼半場和

猪拉多纳

衝四冠唔係靠蠻勁

今晚上演歐霸盃4強首回合大戰，上屆亞軍賓菲加主場迎戰奪冠大熱祖雲達斯。賓菲加剛於葡超捧盃，四冠宏業過咗頭關，但要贏盡四項錦標賽，極講求兵力分配，必須收放有度，今仗遇上賽事大熱祖記，唔可以輕舉妄動，預料會留前鬥後。祖雲達斯踢法保守，首回合作客亦唔會搏住，特別係上半場試探為主，1.95倍半場和有計。

（有線61及201台周五凌晨3時05分直播）

賓菲加上季季尾連失三個冠軍，吸取教訓後明顯學精咗，教練佐治捷西斯近期頻頻輪換，效果唔錯，上仗聯賽贏波提早兩輪奪得葡超冠軍。跟住目標直指歐霸盃、葡聯盃及葡萄牙盃，未來賽程好頻密，尤其係嚟緊周日晚葡聯盃4強作客死敵波圖，嗰場波一場定生死，迫切性甚至比歐霸盃更高。有重大後顧之憂下今仗唔敢去得太盡。
祖記火力有限先求穩

事實上，面對祖記呢種歐戰大師，唔可以靠蠻勁，而係要耐心等待機會，預料賓菲加會盡量控球在腳慢慢搓，控制比賽節奏，提防唔好畀對手取得作客入球，相信要等到下半場先至會真正埋牙。

祖雲達斯「煲魚生粥」成癮，上仗意甲對下游球隊博洛尼亞，都係僅勝1比0。講到尾教練干地戰術保守，行軍速度慢，因此每場創造機會唔多，上圈鬥里昂，贏得甚為驚險。射手泰維斯已近一個月冇波入，陣中另一入波泉源維達爾亦死晒火。近期往往靠派路罰球戰術及保羅普巴後上遠射攻門，效率自然低。祖雲達斯明知自己火力有限，今場應會先做好防守，保持不敗返回主場再搏殺。