歐霸提升地位要靠錢

猪拉多纳

歐霸盃搞極都搞唔起，主要因為定位尷尬，呢個賽事獎金唔高，轉播收入唔高，吸引力自然唔高，所以一直都被歐洲大會所忽視。同屬歐洲球會大賽，歐聯參賽球隊可以賺到豐厚收入，而踢歐霸盃搵得雞碎咁多，難免賽事被唔少名牌球隊視為雞肋，以現時情況睇，短期內都係好難有突破。

今屆歐霸盃四強戰戲碼都算唔錯，祖雲達斯同賓菲加現時係歐洲一線尾球隊，佢哋其實夠料打歐聯，降格落去踢歐霸盃自然超班。而祖記更被視為奪標熱門，因為今屆決賽正正喺佢哋個主場舉行，或多或少會增強球隊爭冠決心，亦令佢哋熱上加熱。不過，賓菲加並唔係善男信女，佢哋主場出擊好犀利，晉級過程仲贏過唔少名牌，但由於名氣唔及對手，今場普遍莊家開緊平手盤，個盤好抵玩，一於捧賓菲加，首回合預期兩隊都會較為保守，兼顧埋入球細！
西維爾盤口硬淨有計

至於同日西甲內訌西維爾主場對華倫西亞，兩隊波本身熟晒路，勝負好睇臨場發揮，論近況西維爾明顯佔上風，呢隊波下半季主場好惡，搏殺絕少失手，今場讓到半一，個盤相當硬淨，有望先下一城。