|
|
澳職季後賽得番三場，買少見少喇！今日嘅西悉尼流浪者主場對中岸水手，同聽日嘅布里斯班獅吼主場對墨爾本勝利呢兩場波，簡單嚟講就等如啲盃賽嘅四強戰，一場決生死！今日踢先嘅西悉尼流浪者同中岸水手，周中都有份踢亞冠盃，結果兩隊一頭一尾：西悉尼誇啦啦首名出線，水手就包尾出局！今場兩隊碰頭，論士氣、信心同埋地利，梗係力撐西悉尼晉級加主勝啦！
（有線64及203台周六下午4時30分直播）
西悉尼因為係常規賽亞軍，可以踢少一輪季後賽，點都有着數，皆因佢哋要應付亞冠盃，以澳職球隊咁單薄嘅陣容，一周一賽對班球員嚟講已經好勉強，再踢多場就真係難頂。西悉尼踢完常規賽，接連喺亞冠盃贏兩場，士氣信心齊晒，依家仲以首名出線，可以專心踢澳職爭霸戰啦！而且今場係宣布季後返日本搵食嘅小野伸二，喺主場同班粉絲講「沙喲啦啦」嘅日子，以佢嘅級數同落力程度，再加埋佢班弗爆隊友，今日一定可以打倒水手。
水手捱長途機散晒
水手上星期又係好似平時咁悶悶地贏咗阿德萊德聯晉級，全場由艾賓尼伊斯爾把握到一次機會快射得手。佢哋周中坐程長途機去咗日本，閒閒地都來回要屈喺機艙內成廿個鐘頭，點會唔腳軟！嗰場波水手仲要輸埋，成班球員嘅心情係點？大家心中有數。今日繼續作客，水手睇怕都應該輸埋，成隊可以早啲放假休息喇！
妹頭推介
西悉尼流浪者Vs中岸水手
主客和（主勝）
晉級隊伍（主隊） |
|
金睛卡
发表于 2014-4-26 10:55
变色卡
显身卡