拿玻里當黑難擋國米

猪拉多纳

意甲雙藍戰，國際米蘭主場對拿玻里，「淺藍」拿玻里球員近期當黑，中堅軒歷基阿祖安奴日前意外炒車，雖然只係皮外傷可以披甲，但要提防佢驚魂未定，加上拍檔費達歷高費南迪斯停賽，防線唔齊人，國米為保歐霸盃席位必全力衝刺，小讓平半吼上盤。

拿玻里已無緣打入前二位，但同時拋離老四費倫天拿10分，極可能以季軍身份參加下屆歐聯外圍賽，今季基本上已提早收工，上仗領先下被烏甸尼斯逼和。軒歷基阿祖安奴日前遇上嚴重車禍，好彩只係面同手部擦傷，應該可以出戰今場賽事，但大驚過後，好可能影響精神集中力，勉強上陣並非好事。

國際米蘭季尾愈戰愈勇，近兩仗全勝攻入6球兼不失，皆因老闆托希爾入主首季，基本目標要球隊獲得歐洲賽資格，點都會衝埋最後4戰。事實上，國米一對阿根廷前鋒莫路伊卡迪、柏拉斯奧腳風非常順，兩人近4仗合共貢獻咗6個入球。拿玻里防線不整下，更加難以抵擋呢對國米孖寶。
TVB301周日凌晨2時45分直播