流浪者愈戰愈勇踢走水手

猪拉多纳

澳職季後賽今日展開四強廝殺，啱啱喺亞冠盃出線嘅西悉尼流浪者會喺主場迎戰中岸水手，呢隊澳職常規賽亞軍近期愈戰愈勇連贏3場，日本中場小野伸二講到明希望可以捧走總冠軍，作為佢嘅告別禮物。依家全隊無論係體力、實力同信心都有保證，要贏頻樸「四圍踢」嘅中岸水手應該無問題，今場一於撐西悉尼流浪者入決賽，捧主勝！

（有線64及203周六下午4:30直播）

西悉尼流浪者以第2名嘅成績完成常規賽，唔使踢季後賽首圈，咁佢哋就有時間抖氣準備亞冠盃比賽。果然，西悉尼流浪者對上兩場都喺亞冠盃度贏波，周中5:0大炒FC貴州後成功晉級，士氣梗係爆晒燈啦！呢場有波入嘅日本中場小野伸二，早就宣布踢埋今季就會返日本搵食，當然希望一嘗總冠軍滋味啦，今仗有主場之利，大有機會踢番場好波。
水手15日踢5場冇氣冇力

同樣要踢亞冠盃嘅中岸水手，上一圈苦戰下險勝阿德萊德聯晉級，之後喺星期三踢亞冠盃，又畀西悉尼流浪者抖少一日，今場已經係「水手」15日內嘅第5場硬仗，試問班球員體力同心理上又點會唔出現疲態吖！今場「疲兵」出擊兼且仲要作客，睇怕佢哋今季澳職都嚟到「終點」喇！
頂占筍盤：西悉尼流浪者（主勝）