紅軍車仔大畀你睇!

猪拉多纳

寸王話留力信唔過 肯定唔再「泊大巴」

車路士領隊莫連奴喺歐聯對馬德里體育會賽後認晒低威，表明寧願放棄英超主攻歐聯，今場作客會揸流攤出副選，甚至青年軍，有冇咁順攤先？莫帥出名夠寸又夠狂，亦出名鍾意玩心理戰、出口術，科娜就唔會對佢呢番「棄英保歐論」信到十足十，利物浦今季有前冇後，主場亦都一樣打死罷就，與其估邊隊贏邊隊輸，不如改捧大盤好過！

車仔喺歐聯4強首回合同馬體會打和0比0一役損兵折將，防線兩大中流砥柱施治同泰利都受傷離場，前者膊頭甩骹肯定收咧，泰利亦扭傷足踝，連埋繼續養傷嘅伊度奧同夏薩特，今場對紅軍共有四大主將缺陣。車仔喺聯賽落後紅軍5分，贏咗都唔會扭轉爭標劣勢，加上歐聯次回合有林柏特及約翰米基爾要坐波監，下場返到主場莫帥要揸住架「殘車」同馬體會鍊過，所以「寸王」就話佢打算今場作客紅軍一仗派副選同青年軍上陣，留力踢歐聯，「寸王」講到似層層咁，紅軍咪好有機贏到車仔？
車仔出副選都夠火力

不過唔好忘記「寸王」最叻玩心理戰，點知佢今次喺咪假認低威，出口術等紅軍鬆懈然後殺佢一個措手不及？而且莫連奴咁要面，今次對住徒弟仔羅渣士領軍嘅利物浦，師傅畀徒弟打冧咪好冇面？連羅渣士都寸爆話唔信佢師傅：「我唔信車仔會派一班o靚仔上陣，因為車仔根本就冇年輕球員，佢哋根本冇機會出場。」擺明寸緊車仔冇青訓，淨係識用錢買球星。其實即使車仔真係派副選上陣，穆罕默德沙拿、舒賀爾尼、丹巴巴亞呢班後備兵嘅級數都夠晒勁，又點會唔夠紅軍砌呀？不過有一點肯定係「寸王」今場唔會再好似對馬體會咁「泊大巴」喺門前玩死守，自然有利雙方爭取「士哥」。
史達寧弗爆「新ＳＡＳ」一樣掂

利物浦依家氣勢如虹，直落聯賽11連勝，但防守不穩呢個問題仍然係爭冠最大阻礙，對曼城同諾域治都係領先兩粒最終險勝3比2，上場對諾域治更顯示出冇咗中場壓迫重要棋子佐敦軒達臣，失去中場控制權，搞到後防壓力超大，不過好在前線仲有過弗爆新星史達寧，喺史杜列治仲未確定能否傷愈復出嘅情況下，史達寧同蘇亞雷斯暫時組成新「ＳＡＳ」組合，攻力不成問題，今場捧大盤仲啱數﹗