馬體會勒住留力歐聯

猪拉多纳

西甲爭標殺入大直路，兩巨頭馬德里體育會及巴塞隆拿今晚分途出擊，榜首馬體會作客華倫西亞，礙於周中有歐聯4強次回合後顧之憂，難免會勒住踢留力鬥「車」。預料教練施蒙尼今場只求3分，小勝收貨，甚至悶和亦可勉強接受，馬體會讓半一，上盤或客勝都唔值博，建議要入球細。

（now 632周日晚11時直播）

馬體會上周中歐聯4強首回合對車路士悶和0比0，可謂意料中事。亦由於馬體會未能於主場勝出，周中去到倫敦肯定更難踢，教練施蒙尼絕對有理由今仗聯賽稍為留力。事實上，即使馬體會今場聯賽和波，仍然可以穩佔榜首，對佢哋爭勝決心有所保留。馬體會亦非擅攻球隊，施蒙尼戰術上一直傾向緊逼防守，臨近季尾就更謹慎，近8場聯賽全勝，但其中7場開細，證明呢套踢法奏效，當然要繼續沿用。

華倫西亞餘下聯賽已冇乜作為，應會將重心放喺周中歐霸盃4強次回合，特別係首回合吞西維爾兩蛋，更需養精蓄銳，謀求收復失地，恐怕唔會去盡。
巴塞-1獻維帥

另一場巴塞隆拿作客維拉利爾，巴塞眾星今仗肯定要為維蘭路華而戰，踢番昔日水銀瀉地攻勢，以慰佢在天之靈。美斯上仗打破入球荒，只要佢發揮正常水準，等閒之輩難以招架。維拉利爾下屆歐霸盃席位穩陣，或會為呢場「追悼會」讓路畀巴塞，直取讓球客勝。

（now 632周一凌晨3時直播）