寸王教徒弟車仔讓客有計

猪拉多纳

今晚英超利物浦迎戰車路士嘅「紅藍大戰」話題性十足，羅渣士同莫連奴嘅師徒較量，史杜列治同費托嘅倒戈交鋒，同時亦係聯賽進攻最強同防守最強嘅「矛盾」對決。雖則「寸王」賽前講明為留力歐聯會派副選應戰，形勢似乎唔多樂觀，但筆者仍然確信呢名「戰術大師」有計全身而退，揀車仔2.28倍「讓球客勝」啱數。

（now621台周日晚9:05直播）

衝擊首個英超錦標嘅利物浦，用「遇神殺神、遇佛殺佛」形容佢哋絕不為過，近14場喺晏菲路出戰13勝1和未輸過，聯賽更加11連勝勁入38球。「紅軍」今場除咗佐敦軒達臣停賽，同埋域陀摩西斯屬於借將關係冇得落場，史杜列治終於克服腿筋傷患復出，可以同蘇亞雷斯重組煞食嘅「SAS」鋒線組合，加上謝拉特、史達寧等猛將繼續孭飛，的確唔能夠睇小。
車仔副選攻弱守強

雖則話如果「紅軍」今場贏波，就會將車路士直接踢出爭標行列，再順手拋離埋曼城，但今場話晒係強強大戰，主帥羅渣士面對首循環擊敗自己嘅師傅莫連奴，真係話贏就贏﹖再者，相比爭標對手曼城仲要作客硬撼爭取歐聯入場券嘅愛華頓，「紅軍」最後兩輪只不過對冇嘢好爭嘅水晶宮同紐卡素，今場唔輸畀車仔嘅話，爭標形勢仍然佔優。

另邊廂，車路士門將施治同中堅泰利喺日前歐聯勇戰受傷，今場要同伊度奧及夏薩特一齊抖，中場拉美利斯喺聯賽偷摑對手又被英足總秋後算帳罰停賽，提早同今季聯賽講拜拜，兼且「寸王」賽前講明為留力周中歐聯4強次回合，將會出副選應戰，聽落好似完全冇得踢咁。
莫連奴食住利物浦

但查實林柏特同約翰米基爾喺周中歐聯要坐波監，今場極有機會拍住唔符合歐聯上陣資格嘅尼曼查馬迪同穆罕默德沙拿正選搏殺，進攻或者唔算強，但防守絕對夠堅挺，再配合防守戰術一流嘅莫帥臨場指揮，利物浦前線未必咁易搵到食。

更何況莫連奴對「紅軍」特別有計，最近8次取得6勝1和1負，但如果嗰1場敗仗仲令讀者有些少擔心嘅話，卡爾萬醒多項數據畀大家，就係車路士近5次喺歐聯4強兩回合中間出戰英超保持不敗，攞到3勝2和，咁樣可以放心捧「讓客」啦。
Data King：紅軍興由頭贏到尾

‧莫連奴近8次領軍出戰利物浦取得6勝1和1負成績。

‧利物浦今季聯賽主場17戰15勝1和1負，15場贏波全部開「主主」。

‧車路士近14場聯賽作客半場從未落後，分別開出9次「半和」及5次「半贏」。
乜都玩錦囊：玩埋車仔「半和」「半客」

利物浦進攻如入無人之境，今季聯賽喺晏菲路贏波都例牌由頭帶到尾，之但係車路士防守亦夠晒堅挺，最近14場聯賽作客半場未試過落後，強如曼城都攻唔入佢哋，不妨吼車仔2.4倍「半和」或者刨冷要4.7倍「半客」。

猪拉多纳