曼城半場剷平水晶宮

猪拉多纳

曼城連續作客不敵利物浦、同主場賽和新特蘭失分之後，爭標主導權就送咗比利物浦同車路士，但領隊比歷連尼仍未放棄，仲睇死紅軍同車仔喺餘下嘅比賽一定會失分！今晚佢哋作客水晶宮，比歷連尼話依家最重要係要贏出比賽，繼續向紅軍施壓！睇嚟今晚曼城一定會搶攻，半場就已經可以擊敗主隊，撐半場客勝！
水晶宮上岸冇嘢爭

曼城雖然早前喺榜首大戰以2:3飲恨輸畀利物浦，但佢哋上場踢番爭氣波，主場以3:1擊敗西布朗，可惜贏波輸人，中場靈魂大衞施華下半場傷出，而且十字軍名單仲有今季為球隊射入18球嘅首席射手耶耶托尼、中場捷西斯拿華斯，令到中場攻擊力大受影響。好彩阿根廷前鋒阿古路傷愈復出後，狀態仍然好弗，上場對西布朗仲有一球進帳。

水晶宮自從由護級專家佩尼斯接手之後，成績突飛猛進！先後擊敗車路士、卡迪夫城、阿士東維拉同愛華頓、上場贏埋韋斯咸之後，更追平喺1992年12月時嘅5連勝球會紀錄，氣勢一時無兩！令呢班波起死回生嘅功臣就係快翼賓捷安，呢位27歲球員喺近4場比賽射入4球，其中3次更為球隊先開紀錄。水晶宮近5場比賽一口氣取得15分之後，依家已手握43分，排喺第11位，已安全護級。所以論戰意同鬥心，一定係爭標嘅曼城秤高啲，就算水晶宮今晚有主場之利都唔被睇好，一於撐曼城半場客勝！