維拉利爾「讓主」唔怕博

猪拉多纳

巴塞哀兵好易走樣

維拉利爾今晚會喺西甲主場迎戰巴塞，「地上最強」前教練維蘭路華前晚病逝，相信一班同佢相識多年嘅球員心情唔多唔少會受影響。維拉利爾今季每逢對聯賽3強表現特別醒神，加上主場威力唔錯，今晚對住哀兵上陣嘅巴塞有力保住不敗，受讓一於敲2.85倍「讓球主勝」

（now632台、TVB13周一凌晨3:00直播）。
「黃色潛艇」鬥強隊特醒

維拉利爾今季喺主場曾令皇馬同馬體會失分，足證威力唔細，加上首循環作客魯營都係僅負當時狀態唔錯嘅巴塞1:2，心理上唔會輸蝕。「黃色潛艇」有杜斯山度士、佩比等有質素嘅靈活型前鋒，又有好波之人卡尼喺中場派牌，鋒力有番咁上下，難怪三番四次成功喺強隊身上取得入球。

巴塞上周幾經辛苦喺魯營反勝畢爾包2:1，終止3連敗頹勢，但係爭標形勢經已非常被動，尤其係條防線唔多穩陣，今仗後防續用「替工」馬斯真蘭奴同新丁馬斯巴查，面對反擊隨時被打殘。呢班波本身士氣已經麻麻，今戰前夕仲有深受球員尊敬嘅前教頭維蘭路華病逝，球員心情更加低落，有心踢好波先奇！