阿仙奴大手掃紐

猪拉多纳

雲格留隊利好消息刺激

英超4哥阿仙奴今輪壓軸登場主場迎戰紐卡素，「兵工廠」賽前收到兩大好消息，一係主帥雲格已宣布效忠球會，軍心大定，二係愛華頓前晚輸畀修咸頓，令佢哋喺前4之爭上取得絕對主導權；反觀風流球隊紐卡素愈踢愈頹，內憂問題嚴重，阿仙奴今仗有力大勝，讓球主勝同入球大可以兼投！

（now 621周二凌晨3時直播）
普多斯基腳風超順

唔少阿仙奴球迷睇雲格唔順眼，但「教授」仍然大把出路，盛傳摩納哥出價2200萬鎊天價年薪撬佢回巢。不過，雲帥對球會夠忠心，賽前再次重申意願：「我同球會講過好多次，我想保持現狀，即係繼續留隊。」雖然「兵工廠」仍有韋舒亞、禾確特及基蘭基比斯等主力養傷，但箭頭普多斯基近兩戰入4粒弗到爆，中場艾朗藍斯同奧斯爾復出後狀態都好，班波總算重現佳態。

紐卡素季尾不愁降班又冇得爭打歐洲賽，主帥柏杜已經一再表示好難叫班球員保持鬥心落力作戰，佢哋近5場輸晒，加埋只入1粒，完全唔掂。最麻煩係柏杜已經控制唔到更衣室，法國球星賓艾化帶頭搞事被雪藏，近日已被踢返祖家，今戰隊內3大法國兵迪保治、穆沙施素高同雷米都可復出，係就係齊腳好多，但到底班兵仲肯唔肯為柏帥賣命就係一大疑問。
去季主場狂數7比3

隨住爭做4哥嘅大敵愛華頓輸波後，阿仙奴取得歐聯席位機會高唱入雲，今場如果贏埋，基本上都好穩陣，球隊近4次對紐卡素贏晒，包括去季主場7比3狂數對手，如有正常發揮，相信又係一場大炒。