告達理功夫了得

不死鸟

本地二十四個練馬師中，只得鄭俊偉、伍碧權、黃汝安同告達理養馬量少過三十匹，喺兵源不足下，難怪前三者仲未贏夠馬會嘅十三W發牌要求﹔相反，告達理喺三月二十二日憑「馬來之光」勝出季內第十三場頭馬畢業，足證運氣同實力兼備。

        截至剛戰為止，告達理今季總共出馬一百六十三次，即平均每個賽日唔多過三隻，今戰出馬四匹，對呢個倉嚟講已算大陣仗。自從四月一日「得運寶」贏谷草一哩後，告廐已個幾月未有進帳，相信今戰應有馬匹出擊，其中較啱心水嘅係「功夫」。

        第六場三班千二米，呢場有唔少路程專家同質新未見底馬，形勢相當混亂，但好多都係靠後勁食胡，計落前速飛快嘅「功夫」會有一定優勢﹔今次雖排八檔起步，但點睇都冇一隻會喺早段快過佢，估計搶出後應能順利貼欄領放，如果冇馬刻意鬥燒，愈放愈順下隨時帶到。始終季尾階段，大部分馬嘅體力已消耗得七七八八，所以幾時都係買放頭馬着數，而「功夫」上仗同程亦喺王志偉胯下入Q，人馬重來要優先留意。

         足智彩方面，拜仁慕尼黑喺積分榜同禾夫斯堡同得六十分居榜首，前者若然今晚喺主場贏唔到利華古遜，咁隨時唔可以蟬聯德甲冠軍，預計主隊一開波即會搶攻，務求可以盡快打開缺口。

拜仁慕尼黑贏面大

        相反，客隊今季已冇嘢爭，除前仗作客贏史浩克04外，近五仗只得兩和兩負，可見買對家較有利。由於拜仁嘅安聯球場起咗唔算耐，所以利華古遜作客鬥拜仁嘅往績唔可以作準，但兩隊近八次交手，拜仁居然錄得七勝一負，呢次不如博主隊至少淨贏兩粒，推介讓球主客和主勝。