跑得叻手執盃耳

不死鸟

噚日提過嘅「夠信心」抽得六檔起步，雖然梁家俊唔騎得改配魯柏軒，但呢匹馬跑條件賽點都有啲級數，三甲一席應走唔甩﹔至於「超勝」仲抽到黃金一檔，續配勞愛德駕輕就熟，有力打開勝門。原本今次賽事仲有幾匹心水馬推介畀大家，點知睇到排位表後，發覺部分唔好彩抽排大外檔，既然跑馬地一向以內檔馬較有利，所以都係揀番啲排內檔嘅馬較穩陣。

        明晚八場最高班只編為三班賽，其中包括馬拉華度賽馬會盃，呢場三班一千米，小妹最睇好「跑得叻」。呢匹馬在港上陣三次得一冠兩亞，而谷草同程兩戰得冠亞各一，證明路有專長﹔上仗喺韋達胯下以大熱身分開齋，既然三歲馬有大把上升空間，韋達停賽轉由旺人柏寶接手亦唔會輸蝕，今戰又抽得黃金一檔，應該仲啱佢嘅貼欄領放跑法。同場對手實力唔算突出，近仗連番上名嘅「皇仁神駒」會有一定威脅，但佢排九檔威力大打折扣，計落最多以位置交代。

大紅人磅輕要防

        尾場三班一哩，「精算大師」近兩仗跑同程非冠即亞，上仗排大外檔出閘亦可以搶埋欄領放，可能係咁用多咗力，結果終點前被慳晒位嘅「特寶樂」追過跑第二，但已證明呢匹三歲馬繼續有進步，前仗佢喺杜利萊胯下贏馬，今次人馬重來擺明想添食。配腳可博「大紅人」，呢匹馬一連兩仗入位，足證狀態回勇，既然今季轉投告達理馬房後未交代，呢次僅負一一九磅有力威脅，配腳要拖。