科蘭着火大旺櫻花

猪拉多纳

遇松鼠例多波入

科蘭着火，非同小可！烏拉圭神級射手科蘭今季強勢加盟日職球隊大阪櫻花，佢近期全面上力，上場梅開二度後被日媒評為「世界最高の決定力」（世界最強把握力），今次佢領軍主場鬥大宮松鼠又係數胡時候，1.62倍大盤捧得過！

（有線61及201台周二晚6時直播）

年屆34歲嘅科蘭今年空降日職，唔少人睇死佢只係想搵個地方養老，佢加盟初期同班隊友未夾熟，踢落好似冇乜料到。不過，經過兩個月嘅磨合後，科蘭愈踢愈順，對上兩場聯賽都入兩粒，神戶勝利船教頭安達亮上場賽後都話要向佢除帽致敬，而日本傳媒更激讚佢擁有「世界最高の決定力」，勁誇！

大阪櫻花季初聯賽成績一般，除咗因為兼顧亞冠盃戰線踢殘之外，王牌箭頭柿谷曜一朗死火係另一主因，佢上季以廿一個士哥成為隊中首席射手，但今季聯賽九戰食緊白果，腳風唔多順。柿谷去季兩戰大宮松鼠取得三個士哥，捕「鼠」有一手，今次有望打破入球荒，兩軍近四次碰頭全大，一於玩大盤啦！
紅鑽讓得起水手

同日浦和紅鑽主場對橫濱水手，水手開季聯賽三連勝係威係勢，但虛火一過即現形，佢哋對上六場聯賽不勝，加埋入得一粒，前線欠缺高產前鋒嘅問題完全浮現，被中國傳媒封為「日本美斯」齋藤學未夠料一個打晒，今場都係難望反彈，紅鑽小讓平半捧上盤！

（有線61及201台周二下午3時直播）