拜仁喪攻皇馬 生死大激鬥

猪拉多纳

歐聯4強次回合今晚上演「生死戰」！兩大熱門拜仁慕尼黑同皇家馬德里上星期首回合嘅對撼未見激烈，皇馬只喺巴拿貝小勝1:0，不過預料今晚情況會大大轉變，非勝不可嘅衞冕拜仁主場出擊肯定搏晒命，況且球會高層落晒柯打要哥迪奧拿加強進攻，遇着反擊力強勁嘅皇馬肯定好睇過戲。睇列貝利、C朗、洛賓同加里夫巴利大鬥法，1.5倍入球大唔使猶豫啦！

（有線61、64、201及203、中央5台周三凌晨2:45直播）

拜仁首回合作客控制戰局下畀皇馬偷襲得手，碧根鮑華幾個高層賽後詐晒型批評哥迪奧拿，話要踢得進取啲。雖然高層干預教練策略唔係咁健康，但「哥帥」面對老細壓力唔多唔少都會作出啲妥協。

事實上拜仁已經落後緊，形勢上都唔到佢哋慢慢嚟，以佢哋喺今屆歐聯主場平均每場入差唔多3球嘅火力，大家對佢哋主場入波應該有信心。不過數據顯示拜仁自從捧走德甲後防線嚴重走樣，失球數字由奪冠前場均0.38球急升至奪冠後嘅1.4球，都咪話唔擔心。
拜仁德甲封王 失球率急升

球迷睇完首回合賽事後，相信唔會懷疑「銀河艦隊」嘅反擊效率，上場加里夫巴利因病做後備，雖然賽前練習佢隻左腳仲包到實晒，但消息話安察洛堤屬意搵佢打正選，用番近期效果唔錯嘅4-4-2陣式。C朗傷愈後亦可強勢候命，令皇馬反擊力再提升。況且C朗喺今屆賽事已經入咗14球，爭1球就打破單季歐聯入球紀錄，淨係咁就已經增添咗佢嘅動力啦！
再領黃決賽坐波監皇馬3將被迫就住踢

不過，皇馬後防都有重大隱憂，事關沙比阿朗素、沙治奧拉莫斯同伊拿拉文迪3位防守主力，如果今場拎黃牌，就算入到決賽都要停賽，呢個心理障礙隨時影響佢哋表現，尤其面對列貝利同洛賓呢類高速球員，稍有猶豫隨時就出事，照咁睇開大機會的確唔細喎！
Data King：皇馬半場例入波

‧皇馬近4場半場都有入波。

‧拜仁主場對皇馬未試過唔失波。

‧C朗上場西甲復出即入兩球。
乜都玩錦囊：拜仁主場交手醒捧W

雖然皇馬有C朗回勇，但佢哋嘅「恐德症」今季仲未醫好，8強次回合去到多蒙特輸0:2，就已經嚇到班「艦隊」球迷鼻哥窿都冇肉。而且拜仁喺主場未輸過畀皇馬，今場1.65倍嘅主勝捧得過。
頂占筍盤：拜仁慕尼黑（入球大）