雷恩要報兩敗之辱

猪拉多纳

法國足總盃周日凌晨於巴黎法國球場上演決賽，由兩支聯賽榜下游球隊雷恩、甘岡爭冠軍，甘岡雖然往績上佔優，不過雷恩陣中主力托禾倫、桑馬干及尼爾遜米基爾都堅有卡士，平手盤波童推介雷恩。

今場係2009年法足盃決賽翻版，當年甘岡以乙組身份爆冷擊敗雷恩捧盃，可惜翌季虛火過晒搞到降落丙組，經過多番努力，今季才得以重返頂級聯賽角逐。甘岡今季聯賽主客兩循環雙殺雷恩，但依家排名反而低過對手，最主要原因係水準欠穩，聯賽三十五場輸咗十七場，落敗比率近一半。相反雷恩聯賽不敗率逾六成，連盃賽在內佢哋近八場只輸過畀富豪球會摩納哥，曾經擊敗里爾、馬賽、打和聖伊天及波爾多，演出明顯較有保證。
中前場卡士勝甘岡

雷恩一對箭頭托禾倫、尼爾遜米基爾分別係瑞典及葡萄牙國腳，中場有曾効力里昂、英超維拉嘅喀麥隆中場桑馬干領軍，側擊亦有早年喺德甲踢出名堂嘅布基納法索翼鋒比度巴，大賽經驗遠勝對手，決賽場合呢點隨時成為勝負關鍵，有力報聯賽兩敗之辱捧盃。
now 714周日凌晨3時直播