爭標頭關曼城追打愛華頓

猪拉多纳

剩低3戰贏晒就掂

周六英超壓軸上演「雙藍會」，愛華頓主場恭候曼城。「拖肥糖」喺上場聯賽「自殺式」輸波後，要攞走來屆歐聯入場券嘅機會相當渺茫，士氣肯定受挫；相反，「藍月亮」受惠於利物浦輸波失分漁人得利，終於攞番爭標主導權，家陣佢哋得番3場波要踢，只要贏晒就9成9攞冠軍，識揀一定係揀1.65倍「客勝」。

（now621台周日凌晨0:30直播）
搶分益紅軍？「拖肥」搏唔搏？

「拖肥糖」後衞艾卡拉斯同史密斯高文上個禮拜輪流擺烏龍，最終淨吞修咸頓兩蛋，家陣聯賽剩餘兩輪，佢哋已經落後阿仙奴4分，張歐聯入場券9成冇得落袋，想球員畀心機再砌過？你估佢哋係機械人冇情緒嘅咩？仲有，大家咪忘記一點，愛華頓同利物浦係同市宿敵兼世仇，佢哋肯唔肯搏命造就「紅軍」？堅難講囉。

就當佢哋肯搏，亦未必做得成攔路虎。事關愛華頓一對守將迪斯甸同菲臘積基爾卡未必趕得切復出，中堅位被迫繼續起用小將史東斯同「炸彈」艾卡拉斯擔正，最弊嘅係唔單止防線唔齊腳，就連第一道屏障、防守中場巴利，又因借將關係冇得落場，面對火力強勁嘅曼城，想唔失波都幾難咯。
「藍月亮」餘下兩仗主場迎弱旅

睇番個賽程同積分榜，「藍月亮」餘下對手除咗愛華頓難搞啲，其餘兩仗都係喺主場迎戰弱旅，換句話說，只要曼城今場開W，重奪冠軍嘅機會就高唱入雲，加上耶耶托尼今場有波入嘅話，將會成為繼林柏特後第2名單季英超入球達20+嘅中場球員，兩大目標在前，而且大衞施華又鐵定復出，筆者相信鬥志高昂嘅「藍月亮」，能夠終結造訪葛迪遜公園4連敗嘅走勢。