車路士「讓主」抵玩

猪拉多纳

諾域治等降班

「藍色戰車」掃射「金絲雀」！車路士架「大巴」上仗喺歐聯4強次回合慘被馬體會「打巢」，不過都冇壞嘅，今場對住作客頹爆嘅「降班膽」諾域治根本唔再需要「泊巴士」，韋利安同上仗有進帳嘅費托等攻擊手，大可施展渾身解數攻番夠本，加埋車仔後防今季水準極高，「金絲雀」想偷雞入番粒都難，一於熱捧1.52倍「讓主」啦！

（now621台周日晚11:00直播）

近期談論車路士嘅焦點，肯定係落喺佢哋嘅「鐵桶陣」戰術身上，不過各位球迷今仗唔使擔心又要睇悶戰啦，睇番藍戰士今季聯賽喺主場僅得1場冇波入，18場入面更有14次攻入至少兩粒，加埋韋利安、穆罕默德沙拿等都經常交出高水準表現，就算係持續低迷嘅費蘭度托利斯，上仗亦成功射破舊東家馬體會大門，今次喺史丹福橋對住哀兵「金絲雀」隨時可以再嚟個「小爆發」。
諾域治聯賽作客8連敗

諾域治可以話係今季英超最不幸嘅護級球隊，最尾4場連鬥「傳統Big4」利物浦、曼聯、車路士同阿仙奴，本身勢頹嘅紅魔鬼仲要揀正對「金絲雀」前炒莫耶斯，似乎個天都整定佢哋降硬班！單計聯賽作客，諾域治已經8連敗，係目前英超第1嘅「作客蟲」；最慘嘅係佢哋近11場外訪賽事只係入到5粒，今場仲要面對全季主場只係失過11粒嘅「藍戰士」，真係咪使旨意破蛋呀！
Data King：車仔2年未試過主場連敗

‧車路士自2012年起，未試過連續兩場主場聯賽輸波。

‧諾域治喺近10場聯賽只係取得7分。

‧車路士今季英超只係失咗26球。
乜都玩錦囊：藍戰士半場冇攻「細」

雖然預期車路士今仗會主攻，但睇番今季車仔就算最終大勝，半場都甚少出現超過1球入球，同佢哋崇尚先穩守、再搶攻嘅踢法不無關係。「藍戰士」近11戰聯賽有9次開出半場入球細，一於食住條水再追1.68倍「半細」啦！