諾在其中:財富之星路有專長

不死鸟

近兩個賽日柏寶加埋贏咗七場，今晚因梁家俊唔騎得，連尾場「重量級」都畀埋佢騎，出足八場當然有唔少機會馬喺手，不過坐騎中居然有七駒抽排八檔或以外，只得第七場嘅「跑得叻」排一檔，相信柏寶今次唔易再連場數胡，但隔晚騎師王佢依然捧成大熱，即管睇吓可唔可以延續旺勢喇﹗

配楊明綸減磅着數

         第五場四班一六五○米，「財富之星」今季六戰累積兩亞一季，而且成績全部喺同程取得，既然呢匹馬至今跑同程僅兩次失三甲，就知佢跑谷草一哩特別醒神。上仗輸畀「精算大師」個幾馬位得第二，如果唔係排十一檔起步，相信會跑得更接近﹔呢匹今季未交代馬鬥志唔使懷疑，改配十磅仔楊明綸亦肯定必拼，一於揀做膽。

         「聚豪精英」近兩戰均入位，前仗谷草一哩輸短頭跑第二，上仗亦僅輸四分三馬位得季軍，未能贏馬認真欠運，今仗排二檔貼欄跑有利，配腳首選。「幸福得寶」上季冇馬贏後，上個禮拜三終喺谷草千八米贏番一次，難得呢匹八歲老馬有狀態，匆匆再出幕後已擺明打鐵趁熱。「哈哈大少」落番四班後連場跑得接近，最近兩仗分別喺同程跑第二，今仗配徐君禮減磅兼排三檔，記得兼顧。

        另一場心水係第六場三班千二米，小妹推介「揀得準」做膽。呢匹五歲馬今季轉去霍利時馬房之後，跑兩仗共得冠亞各一，表現一啲都冇走樣，既然佢跑同程贏過五次咁多，今場對手實力又唔算特別強，贏馬絕對唔出奇。

         「衝勁寶」上場跑田草千四米大敗，但復課後又冇乜唔妥，回師谷草兼負輕磅，有一檔之利要吼。另外，今場快馬唔多，前領嘅「功夫」有力趁勢入位。「福將臨門」唞夠復出體力強，潛質未見底嘅馬要留意。