紅魔打虎傑斯終極登場

猪拉多纳

奧脫福謝幕戰 歡送一代名將

曼聯今季戰績慘不忍睹，連爭歐霸盃席位都好忟水，認真係衰到貼地。嚟到聯賽最後兩場，先係今晚喺主場出戰「老虎」侯城，而呢場波亦極有可能係暫代「魔王」之位嘅傑斯喺奧脫福嘅告別戰，佢或會將自己放落球員名單，必要時後備上陣，紅魔眾將一為傑斯二為粉絲，加上對手侯城已將全副心機擺喺足總盃，戰意成疑，估計曼聯可以喺主場大勝謝幕，捧讓球主勝！

（now 621周三凌晨2時45分直播）
誓攞尾彩氹番魔粉

堂堂英超班霸曼聯今季喺「前魔王接班人」莫耶斯帶領下一直沉淪，跟住傑斯接手領軍第一場大勝諾域治亦只係曇花一現，佢繼承莫耶斯破紀錄嘅傳統，自68年以嚟首度喺主場輸畀新特蘭，而且呢場波更輸得好難睇，「傑帥」嘅排陣同臨場調動都令人搲爆頭，如派完全冇態嘅艾殊利楊格同拿尼正選上陣，之後喺要加強進攻嘅時候又換走埋全隊唯一有創造力嘅桑馬達，結果成隊波踢到不知所謂，唔單止搞到場內嘅費sir睇到「釣魚」，嬲爆嘅「魔迷」更提早離場同發出噓聲以示不滿。

「傑帥」早前表明季尾若不獲球會續約就會宣布掛靴，而且佢亦唔肯做熱門新「魔王」尹戈爾嘅助教，故好大機會喺季尾離開曼聯，所以今場對侯城可能係佢嘅主場告別戰，「傑帥」或會親自上陣對侯城：「我可能將自己擺落後備席，最好梗係出到嚟入埋波添啦！」既要以勝利為自己24年紅魔生涯畫上完美句號，亦要氹番「魔粉」，為呢個災難性球季作結，傑斯今場應該唔敢再試陣，會出番香川真司夥拍桑馬達，以加強中場組織力，而上場因胃病缺陣嘅「魔童」朗尼亦已復操，今仗有望同尹佩斯齊齊上陣「殺虎」﹗
侯城留力爭足總盃

隨住諾域治未能擊敗車路士，比「金絲雀」打少一場但多4分嘅侯城宣布護級成功，今場屬例行公事，而且佢哋要備戰對阿仙奴嘅足總盃決賽，肯定唔會太搏，何況領隊布魯士又係曼聯名將，今場點都會念吓舊情，唔會落老友傑斯面，讓球主勝值得支持。