托起飛腳靠晒宇佐美

猪拉多纳

本人雖然主打德甲多年，不過亦覺得日職充滿親切感，因為這裏滿布前德甲球員，如路華高域、約舒亞堅尼地、槙野智章、稻本潤一等，他們都曾經以汗水灌溉過德國球場的草地！今日日職「加班」，尾場東道主大阪飛腳和德島漩渦上演升班馬大戰，大家亦有機會欣賞到曾在德甲參戰的宇佐美貴史的演出，各位記得捧場！

宇佐美被大阪飛腳外借拜仁慕尼黑期間，上陣時間雖寥寥可數，不過他亦強調，能跟列貝利、洛賓等頂級球星同場操練，總算獲益不淺。之後他在賀芬咸曾獲重用，更在史特加身上射入一記一扭三的Solo金球，盡顯卡士，可惜當教練基斯度於季尾上任後，他又完完全全被打入冷宮，真慘情！

其實以宇佐美的個人技術和級數，絕對有能力在德甲立足，只是身體質素成為絆腳石。現時衷心希望他先再在日職大放異彩，不斷加強肌肉和身體對抗性，有朝一日，我相信他定能重返歐洲舞台。
上季大四喜拆散漩渦

不知上天是否要給這位年輕人多點磨練，宇佐美回國協助大阪飛腳升班後，季前又受到左腿腓骨肌腱移位的傷患而需長休，直至最近才復出先任後備，適逢球隊最近三連敗跌落尾三，今日他有望重新擔正，成為「托起『飛腳』的聖手」之餘，更是再做「德島漩渦的殺手」（註：上季他對德島漩渦曾食大四喜）！

相反，德島漩渦今季一勝十負，未夠班的情況嚴重，今日只要飛腳演出合乎水準，有望以一場大勝止跌回升，並令德島漩渦繼續捲在護級漩渦之中！宇佐美，托起飛腳靠晒你！

（有線61及201台周二下午6時直播）