曼聯喪攻侯城 傑斯4星告別奧脫福

猪拉多纳

告別奧脫福，曼聯4星為光榮而戰！「紅魔」今季淪為球壇笑柄，來屆歐霸盃幾可肯定冇份玩。係就係羞家啲，但話晒孭住曼聯個朵，一眾戰將當然想喺今季最後一次主場賽事做番齣好戲。連埋尼曼查維迪在內，今晚極可能都係里奧費迪南、艾拉同傑斯嘅「奧脫福告別戰」，加埋「老虎殺手」朗尼復出，有能力大炒侯城，捧1.83倍「讓主」。

（now621台周三凌晨2:45直播）

曼聯炒咗領隊莫耶斯後，由傑斯擔任看守領隊，呢位昔日「黃金左腳」首仗領軍就率領球隊大炒諾域治4蛋，但隨住上仗以0:1輸畀新特蘭之後，幾可肯定唔夠熱刺爭來屆歐霸盃參賽資格。以為「紅魔」咁就會放軟手腳？亨格比利就唔係咁睇嘞！
朗尼復出 傑斯踢埋一份

大家都知維迪今夏會以自由身過檔國米，加上里奧、艾拉同傑斯份約都喺季尾屆滿，今仗極可能係呢4粒星嘅「奧脫福告別戰」，當中看守領隊傑斯更加向《鏡報》確認唔會加入「準領隊」尹戈爾嘅教練團，仲自爆會填自己個名喺大軍名單，準備後備落場爭取「士哥」，4星都希望有個Happy Ending，今仗實搏老命都似。

唔係話睇小侯城，但降班唔輪到佢哋，兼且已穩奪來屆歐霸盃入場券，領隊布魯士賽前都話成班球員已經分晒心，將注意力放晒去5月17日對阿仙奴場足總盃決賽，難怪呢班波近3場全部失分兼勁失8球啦！最新消息係朗尼已克服鼠蹊傷復操，今仗可聯同尹佩斯同桑馬達齊齊擔正，對上3次面對侯城勁入6球嘅「魔童」不嬲恰死「老虎」，對住後防唔穩陣加上無欲無求嘅侯城，相信今晚又係「老虎殺手」朗尼嘅Show Time！