曼城主場擺幾維預祝捧盃

猪拉多纳

利物浦親自將冠軍送到曼城前面，「藍月亮」梗係「一句唔該，袋咗落袋」﹗利物浦昨日凌晨自殺式慘和水晶宮，益晒爭標勁敵曼城，「藍月亮」全隊上下自然high到爆，今仗主場對阿士東維拉梗係唔會放過呢個黃金機會，實行狂攻已經上咗岸嘅維拉，手執半隻盃耳，讓對手兩球都照捧啦！

（now 621周四凌晨2時45分直播）

喺利物浦輸畀車路士後，曼城嘅奪冠機會已經大大增加，但佢哋喺心理上仍然有些少壓力，因為餘下兩場仍然係冇失分嘅空間，點知紅軍對住水晶宮跌咗兩分，等同親手向「藍月亮」奉上冠軍獎盃，曼城球員梗係開心到震，連僅餘嘅心理壓力都冇埋，今仗預咗會踢得仲放啲。
打醒精神攞晒3分

不過領隊比歷連尼係個好冷靜同謹慎嘅主帥，見到紅軍領先3球都失分，佢一定會提醒班球員踢得放唔代表喺心態上可以輕敵，照樣要搏盡嚟踢，即使高柏尼、阿古路、耶耶托尼等主將有傷在身都要上陣，務求全取3分，斷絕紅軍一絲希望。依家「藍月亮」無論狀態、士氣都處頂峰，今場更喺自己地頭出戰，要贏維拉兩粒或以上簡直係冇難度。
維拉唔阻人發達

早排仲有降班危機嘅阿士東維拉上場出盡力贏咗侯城，成功護級，依家可以話係無欲無求，今場都係無謂阻曼城發達，而且呢隊波作客已經4連敗，今場又要冇埋前線主力艾邦拉荷，嚟到曼城地獄主場直情係冇得打，1.8倍嘅讓球主勝穩開啦！