賓菲加蓄細搶葡聯盃

猪拉多纳

里奧艾維「泊大巴」好守得

葡聯盃決賽將於今晚喺中立場利亞拿佩索阿體育場舉行，由賓菲加對里奧艾維。賓菲加力圖囊括４大錦標，今仗屬於第2關，球隊志在必得。不過呢支葡超盟主近期征戰頻密，開始吃不消，火力明顯下降。里奧艾維自知技不如人，勢必「泊巴士」喺龍門口死守，加上終極一戰，雙方亦會比較謹慎，預料賓菲加可小勝，但主Ｗ僅得1.24倍冇肉食，建議揀1.85倍入球細。

（周四凌晨3時30分開賽）

上季「三亞王」賓菲加今季矢志要贏晒四項錦標一雪前恥，佢哋已率先奪得聯賽冠軍，上周中亦進身歐霸盃決賽，加上葡聯盃及葡萄牙盃同樣殺入決賽，「四冠王」開始叫胡。無獨有偶，賓菲加喺兩項本土盃賽決賽對手都係里奧艾維，照牌面應該可以袋晒兩隻盃。不過賓菲加四線作戰，踢到腳仔軟，尤其係近期對手都非常惡啃，包括歐霸盃4強兩鬥祖雲達斯，葡聯盃4強撼波圖，耗力甚多。
賓菲加腳仔軟難大炒

賓菲加經過連場激戰，難免會出現疲態，上仗被塞圖巴爾逼和，聯賽主場8連勝斷纜，計埋盃賽近3仗僅入1球，火力大不如前，明顯受賽程拖累，所以佢哋未必大炒到里奧艾維。

里奧艾維目前喺葡超排11位，有幾多斤両可想而知。不過弱隊勝在冇心理負擔，踢「大巴足球」亦唔會被人怪責。估計佢哋會死守到底，甚至唔介意互射12碼分勝負。值得一提，里奧艾維喺今屆葡聯盃6場比賽，有5場保持不失，相當守得，賓菲加要咬入佢哋，並非易事。