格羅寧根夠決心闖歐霸

猪拉多纳

荷甲已告煞科，聯賽五至八名球隊進行附加賽角逐一個來屆歐霸盃席位，今晚先上演兩場準決賽首回合，其中格羅寧根主場鬥維迪斯，近況及決心較強嘅主隊有力先拔頭籌，平手盤揀主隊可作為過關重心。

（周四凌晨零時45分開賽）

維迪斯上半季表現Sharp醒，可惜歇冬後成績走晒樣，踏入2014年16場聯賽只得4勝，季尾最後7場更係未贏過，早前有報道指佢哋私底下畀車路士操控，令到球會多年嚟都唔可以喺荷甲或者歐洲賽發圍。呢單嘢荷蘭足總話會調查，但暫時未有結果，係真係假自行判斷，不過單從成績及近況睇，維迪斯想爭踢歐洲賽嘅決心真係唔及主隊。格羅寧根季尾走勢凌厲，最尾6輪聯賽全部贏晒，包括曾於主場擊敗今場對手維迪斯，首回合主場唔使讓波必捧。
AZ海倫芬大騷娛賓

另一場準決賽首回合阿爾克馬爾（AZ）主場鬥海倫芬，兩軍近況同上述一場好相似，阿爾克馬爾近五場聯賽不勝，海倫芬則連贏四場，但要留意阿軍其實早就拎到附加賽資格，所以近期比賽唔排除有留力之嫌。兩軍今季連盃賽在內3次交手合共炮製14個入波，今場捧大盤較穩陣。

最後推介美職侯斯頓戴拿模主場鬥哥倫布機員，哥倫布機員近五場聯賽不勝，今仗仲有主力韋爾查普停賽，主隊小讓平半捧上盤。