PSG掃雷開P慶冧莊

猪拉多纳

臨近季尾各地聯賽紛紛有王者誕生，好似法甲豪門巴黎聖日耳門（PSG），只要競爭對手摩納哥喺今晚較早時間開波嘅聯賽失分，佢哋隨後主場迎戰雷恩就算輸波，都能提早兩輪蟬聯冠軍，不過作為一場慶功派對，梗係唔想掃興定必大炒雷恩一場，不妨直取讓球主勝。

（TVB 301周四凌晨3時直播）

睇番現時法甲形勢，PSG喺聯賽剩番三輪嘅情況下，已甩開次席摩納哥8分，只要後者今晚主場對甘岡稍有差池，較後時間開波嘅PSG便提早兩輪成功衞冕，雷恩剛喺法足盃決賽不敵甘岡，體力、士氣輸蝕，好難奢求佢哋會極速反彈。
同曼城違FFP重罰「降薪」

不過，PSG賽前收到壞消息，據法國及英國傳媒報道，歐洲足協已決定就PSG及曼城違反財政公平政策（FFP）作出重罰，包括罰款6,000萬歐元、降低球隊總人工支出、限制單筆球員交易最大金額，以及減少歐聯報名人數，其中降低人工支出可能令佢哋吸引唔到球星加盟。英國《天空體育》報道，處分最快要到周五至正式公布。

至於摩納哥主場對甘岡，後者剛捧走法足盃仲慶祝緊，例行公事唔慌搏命。雖然摩納哥今仗贏波難阻PSG封王（就算摩納哥獲勝，只要PSG打和雷恩便奪冠），但為報法足盃4強一箭之仇必定搏甩髀，貝碧托夫連續三仗有士哥弗爆，主勝穩開。

（TVB 301周四凌晨1時直播）