爭冠軍砌硬維拉曼城[-2]殺無赦！

猪拉多纳

耶耶托尼Top Fit擔正

贏多兩場，即可封王！曼城剩低兩輪聯賽只要攞晒6分，就可以3年內兩度成為英超霸主，今晚主場出擊鬥維拉，試問又點會唔去盡？況且鎮隊之寶耶耶托尼證實可擔正，由佢夥拍拿斯尼同迪斯高合組「藍月鐵三角」，無欲無求嘅維拉睇怕都係等劏，就算「藍月亮」讓到「-2」，1.8倍「讓主」都捧得過！

（now621台周四凌晨2:45直播）

曼城4月中連環失分畀利物浦同新特蘭之後，奪標希望諗住凍過水啦，但隨住「紅軍」上月底不敵車路士加上昨晨被水晶宮逼和，「藍月亮」家陣落後踢多1場嘅「一哥」利物浦1分，剩餘兩輪只要贏晒維拉同韋斯咸就可以封王，可預期今晚肯定殺無赦。

今季已經攻入19個聯賽入球嘅耶耶托尼，上仗鬥愛華頓踢到65分鐘就退下火線，唔少人都以為佢觸傷4月中鬥利物浦拉傷肌肉嘅舊患，但查實領隊比歷連尼只係以防萬一將佢收起，留力撼今晚嘅對手維拉，「Yaya」前日已證實「托弗」可擔正，仲呼籲隊友要打醒十二分精神：「今戰形勢同前季煞科日險勝昆士柏流浪3:2場波好似，絕對唔能夠掉以輕心。」
維拉上岸冇嘢爭

雖然阿根廷射手阿古路受鼠蹊傷困擾原則上會缺陣，但「阿Kun」自從3月初復出之後，就畀人一種勒住踢唔想喺世盃前受傷嘅感覺，反而迪斯高就愈踢愈有，近3仗狂入3球，加埋近9仗貢獻2球、4次助攻嘅拿斯尼，淨係呢個「藍月鐵三角」都夠照啦！

對家維拉上場以3:1擊敗侯城之後已確保上岸，無欲無求計鬥心已經輸曼城幾條街。況且呢支中部球隊近11次英超造訪曼城輸咗10次，近3次聯賽去到「藍月亮」地頭更加次次輸鑊勁（0:5、1:4、0:4），今鋪都係聽炒居多。
Data King：曼城對賽贏到開巷

‧維拉自07年4月開始未試過作客砌低曼城。

‧維拉近7個聯賽入球當中，有6球係嚟自上半場。

‧曼城對上11次英超主場鬥維拉贏咗10場。