新特蘭 西布朗做「細」界

猪拉多纳

隨住喺近4場連攞10分，新特蘭依家已經領先第18位嘅諾域治2分兼踢少1場，護級形勢大好。佢哋今晚喺主場迎戰西布朗，攞到1分都幾乎肯定成功護級，相信佢哋會以唔失波為首要目標，1.88倍「入球細」勝在穩陣。

（now622台周四凌晨2:45直播）
和波收場大家Happy

新特蘭賽前收到好消息，就係佢哋唔使因為池東沅違規落場一事扣分，成隊波可以鬆口氣。佢哋依家除咗多諾域治2分外，仲攞住13球得失球優勢，換言之佢哋今晚只要保住不敗，下季好大機會繼續留喺英超搵銀。就算佢哋最近連贏曼聯同車路士走勢大勇，但相信「黑貓」都唔會亂咁搏，免得偷雞唔成蝕揸米。

對手西布朗目前仲排高過「黑貓」一位暫列16，而且領先第18嘅諾域治3分兼踢少場，得失球差又Lead住19球，基本上已經上咗岸，今戰可以攞到1分更加篤定留班，預料領隊梅爾實會叫班球員以1分為目標。既然你唔攻時我又想守，點會多「士哥」呢？