華拉封死艦隊

猪拉多纳

主場擺鐵桶陣

皇家馬德里上輪聯賽大意失分，最後3場一定要全勝先有機會奪冠。今輪佢哋先要過華拉度列呢一關，唔好以為對手係護級分子就好易對付，查實華拉度列對住勁旅隨時為求一分死守，而且主場表現唔錯，作客嘅「銀河艦隊」要贏都唔係咁易。今場華拉度列受讓兩球，一於冷敲2.3倍嘅「讓球主勝」！

（now632台周四凌晨3:00直播）

皇馬上場對華倫西亞，一時大意搞到最後只可以2:2和波，唔能夠趁馬體會輸波收窄積分差距，爭標形勢被動，最後3場要全勝仲要望馬體會輸波先掂，難得主帥安察洛堤對隊波依然好有信心，《機密報》尋晚爆佢連曼聯開出1,800萬歐元世界第一高薪嘅領隊聘約，佢都一樣Say No。
安帥拒絕曼聯天價合約

但係按西班牙《世界體育報》計出嚟條數，剩低嘅聯賽爭標戰，可能出現嘅結果足足有729個咁多，最後得出結論係，馬體會有71.33%機會封王，而「銀河艦隊」勝算只得可憐嘅5.76%，睇怕皇馬班球員聽完之後都戰意盡失，集中精力踢歐聯決賽好過啦！就算佢哋今場冇傷停問題，但係對可能打「擦鞋仔波」嘅華拉度列，有機會失分兼失冠。

排第18嘅華拉度列喺地頭出戰絕對唔差，到目前為止主場只係輸過3場，3強之一嘅巴塞到訪更加係倒灶輸波！華拉度列呢季主場防守算係唔錯，今場對住皇馬實行以守為攻，博攞一分，之後兩輪對貝迪斯、CF格蘭納達先博盡護級，所以今場「銀河艦隊」想贏真係有一定難度o架！