方嘉柏+潘頓谷戰最紅

猪拉多纳

方嘉柏與潘頓是近期谷戰最紅組合，對上三期二人已合作豪奪五W，練騎昨晚再接再厲，攜手勝出「紅簿仔」延續強勁數據。同晚小方尚有「飛天龍駒」及「龍華太旨」報捷，潘頓則另贏「幾叻仔」與「勁飛翔」，各自演出帽子戲法，旺門拍檔齊齊威震快活谷，點夠你哋玩？
       
方嘉柏

方嘉柏昨晚十駒列陣出足八場，頭五場已狂掃三冠兩亞，買Q冇佢冇錢收，至第六場才斷纜。首次在港打開勝門的「紅簿仔」，方嘉柏則認為場地濕滑有幫助。練者續說：「『紅簿仔』屬歐洲馬，今場跑較淋場地，發揮大有幫助，當然馬兒之前已連番跑近，今次把握好檔之利，遂成功出頭。」
       
紅簿仔原本已報跑周XX班千六米並獲正選，昨晚勝出後可以抖抖。
龍華太旨五捷

至於近六戰五冠一亞的「龍華太旨」，馬主謝劍汶雖右腳骨折，昨晚仍堅持坐輪椅入場，最終愛駒沒有令他白行一趟，成為今季繼「神舟十號」及「迎風飄揚」後第三匹五捷馬。
       
潘頓

趁莫雷拉昨晚開始停賽三期，潘頓把握機會連中三元，成功拉開頭馬領先差距至十三場，向首奪冠軍騎師寶座跨進一大步。第二場潘頓重新接手上仗剛由雷神贏完的「幾叻仔」，完成連捷任務。沈集成全晚獨出此駒一擊即中，開開心心提早收工。練者賽後分析說：「『幾叻仔』上場贏馬後勇況不減，可能經莫雷拉省一省，表現再進一步，臨場跑道偏軟亦有利發揮。谷草千二米是馬兒最佳路程，無奈快活谷下月提早煞科，要另作部署。」